विधान-कज्जल छंद*

विधान-

*कज्जल छन्द*   

*(14-14)*

विशेष - 

14/14 मात्रा के 4 चरण वाले समपाद मात्रिक छन्द आय.

*हर चरण के आखिरी मा गुरु, लघु अनिवार्य*

उदाहरण-

*समय रहत ले अरे चेत* 

रुखराई ला  काट काट 

नदिया नरवा पाट पाट 

नँगत बनाये नगर हाट

करत हवस का रे लुवाट।।

सहर लील गिन हमर खेत 

लाँघन अब लइका समेत 

सपना मन बन गिन परेत

समय रहत ले अरे चेत ।।

चेताइस केदार नाथ 

भुइयाँ के झन छोड़ साथ 

नइ तो हो जाबे अनाथ   

कुछु नइ हे रे तोर हाथ ।।

जेला कहिथस तँय विकास 

वो तो भाई हे बिनास 

समझावय धरती अगास 

भुइयाँ ला झन कर हतास ।।

हरियर कर दे खेत-खार 

जंगल के कर दे सिंगार 

रोवय झन नदिया पहार

पीढ़ी-पीढ़ी ला उबार ।।

* अरुण कुमार निगम*